ភ្នំពេញ៖ រដ្ឋាភិបាលកម្ពុជាតាមរយៈក្រសួងបរិស្ថាន បានប្ដេជ្ញាចិត្តក្នុងការកាត់បន្ថយការបាត់បង់ព្រៃឈើមកនៅត្រឹមពាក់កណ្តាល ក្នុងឆ្នាំ២០៣០ ស្របជាមួយនឹងយុទ្ធសាស្រ្តរេដបូក ខណៈកម្ពុជាកំពុងរៀបចំនីតិវិធីលក់ឥណទានកាបូនបន្ថែមទៀត។
ក្នុងឱកាសពិភពលោកប្រារព្ធទិវាព្រៃឈើពិភពលោក្រោមប្រធានបទ«ព្រៃឈើ និងនិរន្តរភាពនៃការផលិត និងការប្រើប្រាស់» កាលពីថ្ងៃទី២១ ខែមីនា ឆ្នាំ២០២២នេះ រដ្ឋលេខាធិការក្រសួងបរិស្ថានលោក នេត ភក្ត្រា ឲ្យដឹងថាប្រទេសកម្ពុជាបានប្តេជ្ញា ដាក់ឱ្យដំណើរការនូវប្រព័ន្ធត្រួតពិនិត្យព្រៃឈើជាតិ និងប្រព័ន្ធព័ត៌មានសុវត្ថិភាពបរិស្ថាន និងសង្គម សម្រាប់ការអនុវត្តគម្រោងកាត់បន្ថយការបញ្ចេញឧស្ម័នផ្ទះកញ្ចក់ពីការបាត់បង់និងរេចរឹលព្រៃឈើ (REDD+) និងកំណត់គោលដៅកាត់បន្ថយអត្រានៃការបាត់បង់ព្រៃឈើមកត្រឹមពាក់កណ្តាលនៅត្រឹមឆ្នាំ២០៣០ ក្នុងវិស័យព្រៃឈើនិងការប្រើប្រាស់ដី (FOLU) ស្របតាមយុទ្ធសាស្ត្ររេដបូកជាតិកម្ពុជា។
លោកបន្តថា តាមរយៈយកចិត្តទុកដាក់ខ្ពស់លើការការពារនិងអភិរក្សធនធានធម្មជាតិដោយថែរក្សាឈើពីក្រសួងបរិស្ថាន កម្ពុជាមានសុទិដ្ឋិនិយមថានឹងអាចលក់ឥណទានកាបូនបានបន្ថែមទៀតក្នុងឆ្នាំបន្តបន្ទាប់។
បច្ចុប្បន្ននេះ កម្ពុជាមានផ្ទៃដីអភិរក្សទំហំ ៧,៣លានហិកតា ឬស្មើប្រមាណ ៤១%នៃប្រទេសកម្ពុជា។ រាជរដ្ឋាភិបាលកម្ពុជានិងដៃគូ ក៏កំពុងស្វះស្វែងរកទីផ្សារថ្មីៗ និងរៀបចំនីតិវិធីផ្សេងៗបន្ថែមទៀតដើម្បីលក់ឥណទានកាបូន។
ព្រៃឈើ បានដើរតួនាទីសំខាន់ក្នុងការការពារប្រព័ន្ធអេកូឡូស៊ីនៃភពផែនដី តាមរយៈការលក់ឥណទានកាបូនក្នុងទីផ្សារកាបូនស្ម័គ្រចិត្ត ថវិកាដែលបានមកនឹងយកទៅប្រើប្រាស់គាំពារលើការងារអភិរក្ស និងការបង្កើតសេដ្ឋកិច្ចសម្រាប់ប្រជាសហគមន៍តំបន់ការពារធម្មជាតិនៅក្នុងតំបន់នោះ៕